Flik ha Folk #8

Kozh ha yaouank, bras ha bihan, bloavezh mat deoc’h a reketan : labour didorr, boued tomm ha poazh, kig-ha-farz a grabadennoù, a-hed ar vuhez kalon laouen ha dreist-holl ma vo eürus ho planedenn !
Prometet ‘moa, abaoe pell, d’am flac’h Madalenn, 12 bloaz, lakaat tonioù a blij dezhi. Ma, neuze, evit kregiñ ar bloavezh nevez e vo selaouet ouzh tonioù a bep seurt dibabet ganti. Un tamm rockoc’h e vo neuze !
Ma, evit poent, aze’it en ho kador rodek muiañ karet. Prest ho tivskouarn ? Deomp de’i neuze evit abadenn Madalenn !

 

 

Pellgargañ an abadenn

Atersadenn Gweltaz Adeux, Tara Adeux ha Nikolaz Guerin

Deuet eo Gweltaz Adeux ar c’haner mil vrudet e Breizh a-bezh evit enrollañ an abadenn Naoned e Live.
Tara Adeux ha Nikolaz Guerin a oa gantañ evit ar sonadeg enrollet e studio Radio Kerne Naoned.
A-raok enrollañ an abadenn o deus respontet d’un nebeud goulennoù savet gant Marianne Vaidie.
Ganto e vo klasket kompren petra eo ho sell da skouer war micherioù ar sonerezh hiriv an deiz, daoust hag-eñ eo aesoc’h ober eus ar sonerezh e vicher eget er bloavezhioù 80 pe 90. Pe c’hoazh gant peseurt strolladoù int levezonet.
Hag ouzhpenn da-se dre ma eo skignet ar sonadeg e-kerzh mizvezh ar brezhoneg hag ar gallaoueg e vo klevet o santimant war stad ar brezhoneg e Bro-Naoned.
Nag a draoù da ziskoachañ ganto.

Pellgargañ

Atersadenn Katell Leon : Levenez, ur raktres magouri nevez e Naoned

Krouet e 2017 eo bet ar mikro-vagouri Youn ha Solena a c’hell degemer 11 bugel ha berzh ‘neus graet. Katell Leon, unan eus krouerezed ar raktres Youn ha Solena, a fell dezhi bremañ adkregiñ ganti met gant ur raktres brasoc’h c’hoazh. Ur vagouri a zegemerfe 40 bugel en holl. Hiroc’h gant Katell Leon ouzh mikro Marianne Vaidie.

 

Evit harpañ raktres Levenez : https://www.okpal.com/creche-en-breton-levenez/?fbclid=IwAR1AC4kI59BgrD7vfBWN6tYpEpnNrd2_NFyvVH_5sRZU-w-v2wT-lCaWNUM#/

Pellgargañ

Reportaj ar CEBEP 44 – gant Remi Toulhoat, Renan Kerbiquet ha Mallorie Creac’h

E Liorzh la Fonderie war enezenn Naoned ez eus bet aozet un happening gant ur strollegezh nevez krouet ar CEBEP 44 hag a zo ur c’hollektif evit an deskadurezh e brezhoneg e skolioù publik Liger-atlantel.
Erruet int skuizh gant rektor akademiezh Naoned, bep tro pa fell d’ur skol digeriñ ur c’hlasad divyezhek eo ur sapre afer. Ne zouj ket ouzh al lezenn votet e 2013 a embann splann eo ret aesaat an deskadurezh er yezhoù rannvroel.
6 skol a ginnig un hentenn divyezhek el Liger-Atlantel dija hag 8 skol ouzhpenn a fell dezho digeriñ hentennoù divyezhek er bloavezhioù a zeu, 4 e 2021.
Kroget eo an happening da 11 eur gant ur gentelig tañva d’ar brezhoneg evit ar gazetennerien hag ar c’hazetennerezed.
Da c’houde roet ez eus bet un diplom d’ar c’hêrioù engouestlet evit diorren an deskadurezh brezhoneg en ho kumun.
Hag echuet o deus gant ur brezegennig o lavar e vo kaset dre lizher, en un doare arouezel, kod an deskadurezh da rektor akademiezh Naoned.
Gant Remi Toulhoat, prezidant Divyezh Breizh
Renan Kerbiquet, sekretour ar gevredigezh evit ar gelennerien ha kelennerezed, Kelennomp !
Mallorie Creac’h, skolaerez er skol divyezhek ar Marsauderie e Naoned

Pellgargañ